Регионалната кошаркарска АБА лига одлучи во новата сезона, по завршувањето на регуларниот дел од натпреварување, во плеј-офот да играат осумте најдобро пласирани клубови.

– Собранието на АБА лигата на седницата во Бар го усвои Статутот на натпреварувањето, како и сите други потребни прописи и акти, кои се однесуваат на непречениот почеток и тек на сезоната 2022/2023. Собранието донесе одлука дека идната сезона во плеј-офот ќе учествуваат осум клуба – соопшти АБА лигата.

Четвртфиналето и полуфиналето ќе се играат на два добиени натпревари, а шампион ќе биде екипата која прва ќе стигне до три триумфи во финалето.

– По конструктивна дебата и анализа на сите аспекти на функционирањето, донесовме низа одлуки кои гарантираат понатамошен напредок на натпреварувањето – стои во соопштението на АБА лигата.

Новата сезона во АБА лигата ќе започне на 30 септември, а Црвена звезда ја брани титулата. Потсетување дека македонскиот шампион МЗТ Скопје Аеродром се врати во елитата, а во првото коло ќе гостува токму кај актуелниот првак Црвена звезда. Во другите мечеви на стартот се среќаваат: Будуќност – Сплит, Цедевита Олимпија – Борац, ФМП – Мега, Игокеа – Морнар, Задар – Дерби и Цибона – Партизан.

МЗТ Скопје Аеродром ја почнува одбраната на титулата против ТФТ