Подготовката на торти и колачи ни малку не е едноставна работа. Слаткарите знаат дека е неопходно да се следи рецептот бидејќи тешко ќе успеете без точни инструкции, а добро е да имате и неколку трикови во ракавот.

Користете сито
Тестото ќе биде повоздушесто и подобро ќе нарасне ако добро го просеете брашното пред да ги подготвите слатките. Затоа, не го прескокнувајте тој чекор во рецептите и наоружајте се со ситно сито.

Топла купка
Ако користите ладни јајца, нема добро да се соединат со останатите состојки, а за да го скратите времето што треба да го поминат на собна температура, потопете ги во топла вода десет минути.

Треба да знаете кога да престанете
Шеќерот и јајцата треба да се мешаат долго, додека не се удвои волуменот, но ако долго го мешате брашното, тестото за торти и колачи нема да биде доволно сочно и меко бидејќи ќе го активирате глутенот.

Големина на јајцата
Десертите се како математичка формула, никогаш не додавајте состојки случајно, туку подгответе вага. Што се однесува до јајцата, повеќето рецепти се однесуваат на големи јајца, затоа избегнувајте да користите мали.

Време за рерната
Откако ќе го намачкате калапот за печење со масло и ќе го обложите со хартија за печење (која исто така треба да ја намачкате, но не претерувајте за да не бидат премногу тврди рабовите на пандишпанот), време е да ја истурите смесата. Откако ќе ја истурите смесата во калапот, не ја допирајте премногу. Калапот ставете го што поскоро во загреана рерна.

Трикот со чепкалка за заби
За време на печењето не ја отворајте вратата речиси до крај, оставете да помине барем половина од времето за печење. На крајот можете да проверите дали пандишпанот е испечен со боцкање на чепкалка за заби. Доколку чепкалката ја извадите чиста, пандишпанот е готов.

Вистинската температура
Во зависност од видот на тортата што ја печете, варира и препорачаната температура, но стандардот е помеѓу 165 и 180 степени. Ако ја поставите рерната на превисока температура, резултатот може да биде сува торта.

Млеко и ликер
Маслото дава помек, а путерот поцврст пандишпан, а за да биде посочен, готвачите често знаат да го посипат со шеќерен сируп по печењето. Ќе ви послужи и обично или кокосово млеко и ликер, а за која и течност да се одлучите, нанесете ја со четка.

За да не се исуши тестото
По печењето, тортата или колачите можете да ги покриете со пластика , а потоа со алуминиумска фолија за да не се исушат поради воздухот и влажноста. На собна температура, без заштита, десертите брзо се сушат дури и ако имаат глазура.

Сол за подобар вкус
Иако се додава во мали количини, солта е неопходна состојка бидејќи го нагласува вкусот на другите состојки како чоколадото и овошјето, а доколку при мешањето се додаде во белките, шлагот ќе биде поцврст. Некои готвачи знаат да додадат и малку брашно за поцврст шлаг.