Звучи неверојатно: Мачките имаат 300 изрази на лицето преку кои комуницираат
Една нова студија открива дека мачките користат речиси 300 изрази на лицето за да ги покажат своите чувства.
За време на едногодишното истражување, научниците снимиле вкупно 276 различни изрази на лицето во глутница од 50 мачки кои живеат во едно кафуле во Лос Анџелес. Изразот на лицето на мачките се движел од разигран до агресивен, пишува „Лајв саенс“.
Ова е една од првите студии што навлегува подлабоко во тоа како мачките комуницираат, настрана од очигледното предење и мјаукање.
Во студијата се вели дека изразите на лицето кај кучињата, шимпанзата и луѓето често биле проучувани со текот на времето, при што е откриено дека луѓето имаат 44 изрази на лицето, кучињата 27, а шимпанзата неверојатни 357. Сепак, недостигаше истражување за експресивноста на мачката.
„Литературата е многу ретка, а многу студии се фокусираа само на односот меѓу мачките и луѓето во текот на 10.000 години припитомување. Во кафулето за мачки успеавме да ги документираме спонтаните интеракции меѓу мачките и да ги снимиме нивните изрази на лицето“, изјави Британи Флоркиевич, коавторот на студијата и доцент по психологија.
Секој поединечен израз комбинирал приближно четири од 26 уникатни движења на лицето, вклучувајќи отворена уста, проширени или згрчени зеници, трепкање, свиткани агли на устата, лижење на носот и различни положби на увото.
За време на една интеракција, научниците забележале дека еден пар мачиња брзо го смениле расположението – од игриво до агресивно.
„Беше изненадувачки да се видат како се борат во играта, но потоа работите ескалираа во агресивна борба. Можете да ја видите промената во нивните изрази на лицето. Прво, очите на едната мачка беа опуштени, а ушите и мустаќите беа напнати, во позиција да ѝ пријдат на другата мачка. Но, тогаш сè се промени, таа ги повлече ушите и мустаќите наназад и брзо го промени своето однесување“, раскажува Британи.
По прегледувањето на снимките, научниците заклучиле дека изразите на лицето на мачките се попријателски (45 отсто) отколку агресивни (37 отсто). Имаше и 18 отсто од оние кои спаѓаат во двете категории.
Научниците, исто така, открија дека многу изрази – вклучувајќи го и она што тие го нарекоа „лице за играње“, што се карактеризира со повлечени агли на устата и спуштена вилица како мачката да се смее – се слични кај голем број видови, вклучително и луѓето, кучињата и мајмуните.
Истражувачите сè уште се надеваат дека студијата ќе помогне да се расветлат безброј изрази на видот кој често се опишува како повлечена, незаинтересирана и студена.
„Се надеваме дека засолништата и здруженијата за животни ќе го искористат нашето истражување за подобро да ги проценат мачките што се грижат за нив“, вели Британи
„Исто така, ни пристапија компании кои сакаат да дизајнираат апликација која им овозможува на луѓето да снимаат [и декодираат] изрази на лицето на мачките“, додаде таа.