И покрај предизвиците, остануваме посветени на патот кон ЕУ и за нас е важно да станеме дел од европското семејство, каде и географски и културно припаѓаме. Но и покрај ова, не се концентрираме само на Европа, туку соработуваме и со сите други со кои делиме исти цели, истакнал потретседателот на Собранието Фадил Зендели на денешната средба со претседателот на Глобалниот совет за толеранција и мир, Ахмед бин Мохамед ал-Јарван.

Како што се наведува во соопштението објавено на веб страната на Собранието, Зендели рекол дека како мала земја, нашите капацитети не се многу големи, но со нашите знаења и други можности, можеме да придонесеме кон толеранцијата и мирот на глобално ниво.

Потпретседателот на Собранието на средбата го запознал гостинот со составот, структурата и функционирањето на нашиот законодавен дом и како заеднички, власта и опозицијата, се справуваат со пандемијата, која остава не само здравствени, туку и последици врз економијата, образованието и други важни сегменти во општеството. Во таа насока, Зендели ја потенцираше важноста од конструктивен дијалогот за секое демократско општество.

Претседателот на Глобалниот совет за толеранција и мир, Ахмед бин Мохамед ал-Јарван информирал дека нивната регионална канцеларија за Балканот е отворена токму тука, што е само знак дека високо се цени она што нашата земја го има направено во насока на добрососедски односи, со визија за толеранција и мир, што е силна порака до Европа и светот.

Како што се наведува во соопштението Ал-Јарван остави отворен простор за слободни идеи за функциорање на оваа канцеларија, со можност да се организираат настани со гости од балканските земји и на тој начин да се покаже дека овој регион, без оглед на минатото, може да живее во толеранција и мир.