Градот Скопје информира дека поради асфалтирање со завршен слој на булеварот „Крсте Мисирков”, утре почнувајќи од 6 часот наутро до 5 часот на 19 септември 2021 година, потегот од крстосницата со булеварот „Гоце Делчев” до крстосницата со булеварот „Кочо Рацин”, во насока од ТЦ „Мавровка” кон „Веро Џамбо” ќе биде комплетно затворен за сообраќај.

Како што посочуваат од Град Скопје, сообраќајот ќе се одвива еднонасочно во спротивниот правец (кај МАНУ).

– Во недела (19.9.2021 година) почнувајќи од 6 часот наутро, па сѐ до 5 часот утрото на 20.9.2021 година, комплетно затворен за сообраќај ќе биде спротивниот правец (во насока од „Веро Џамбо” кон ТЦ „Мавровка”). Додека траат градежните работи на овој потег од булеварот Крсте Мисирков, сообраќајот ќе се одвива еднонасочно во правец од ТЦ „Мавровка” кон „Веро Џамбо”, соопштуваат од прес-службата на Град Скопје.

Апелираат граѓаните да се придржуваат на воведениот привремен сообраќаен режим, да ја почитуваат поставената патна сигнализација и да ја приспособат брзината на движење на условите на патот.

Извор: МИА