Апелирам до Државната изборна комисија (ДИК) брзо да влезе во постапка за набавка на апарати за гласање со отпечаток од прст, за да може да се исполни ова законски вградено решение, изјави денеска премиерот Зоран Заев пред Владата.

– Ќе направиме се да набавиме тоа што зависи од нас. Министерот за финасии реагираше конкретно. Пари во буџетот има, ако фалат, имаме ребаланс. За тоа да се направи, секако, дадовме писмено одобрение од Финансии за да може претседателот на ДИК и целата Комисија да влезат во постапка на набавка на апаратите за отпечаток од прстот, рече Заев.

Тој верува дека набавката ќе заврши до локалните избори, бидејќи, како што рече, има уште околу осум месеци, а со современите европски технологии очекува тоа брзо да се направи.

– Тоа може да ја зголеми довербата во гласачкиот процес, што е многу важно. Врв на демократијата е гласањето. Апелирам до ДИК, сите владини служби стоиме на располагање, да инсистираме брзо да се направи набавката, посочи Заев.

Премиерот додаде оти разговарал со министерот за внатрешни работи, Оливер Спасовски кој му посочил дека се подготвени целата база да ја дадат на ДИК, односно, како што рече, се работи за трансфер на информатички податоци, што, според него, е лесно спроведливо.