Последните три недели петмина пациенти сместени во Специјализираната болница за геријатриска и палијативна медицина „13 Ноември“ во Скопје починаа од ковид-19, потврдуваат за „Слободен печат“ извори од раководството на болницата. На клиниката моментално има уште 11 позитивни пациенти на кои 21-дневната изолација им истекува во четврток и се очекува да се излекуваат и негативизираат.

Директорката на клиниката, доктор Салија Љатиф Петрушовска за „Слободен печат“ вели дека пациентите кои починале имале коморбидитети, меѓу кои и карцином и кардиолошки дијагнози.

-Единаесет пациенти се позитивни во моментот и се во добра здравствена состојба. Забележавме дека има голема улога примената доза на вакцина. Тие со две примени дози речиси се асимптоматски, а оние со потешка клиничка слика се невакцинирани. Имаме и пет пациенти кои се реинфицирале, значи претходно биле заразени, прележале, примиле две дози, па пак се заразиле. Ги почитуваме препораките, персоналот е подготвен, обезбедена е терапија и имаме комуникација со Инфективната клиника по потреба за лекар супспецијалист, вели доктор Љатиф Петрушевска.

Според нашите информации, на геријатрија има и неколку од медицинскиот персонал кои се позитивни на коронавирусот и се во изолација. Пациентите почнале да се заразуваат пред околу три недели, еден пациент кој бил пренесен во ГОБ „8 Септември“, но за седум дена се излекувал.