Повеќе од 30 јавни личности, голем број лекари, локални авторитети и влијателни личности на социјалните мрежи чии лица ќе бидат објавувани во видеа и на постери, ќе бидат вклучени во масовната кампања на владата за имунизација против ковид 19, дознава Слободен печат.

Според нашите информации од владини извори, за кампањата предвиден е буџет од 15.635.580 денари или околу 250 илјади евра. Јавната набавка е извршена во шест дела, а три агенции ќе бидат вклучени во нејзината реализација, агенцијата Рејтинг, Еден на еден и Техно графика. Досега снимени се три квалитетни спотови и голем акцент е ставен на социјалните мрежи каде ќе има најмногу содржини како видеа така и едукативни графички решенија, разбивање на митови и неточни информации преку графички содржини и пораки од лекари и здравствени работници. Кампањата ќе се одвива најмалку до крајот на оваа година.