За десет дена МОН ќе соопшти дали ќе има поместување на почетокот на учебната година
Министерството за образование и наука за десет дена ќе излезе со став дали ќе има поместување на почетокот на учебната година од стандардниот термин 1 септември.
Како што најави министерот Јетон Шаќири, пред Комисијата за човечки ресурси следната недела ќе бидат претставени три предлози за почеток и завршување на учебната година.
Првиот предлог до МОН е учебната година да почне како и досега – на 1 септември, вториот е да почне на 11 септември, без пролетен распуст, и да трае до средината на јуни, третиот предлог е да почне на 1 септември, да има пролетен распуст од пет дена и учебната година да заврши во средината на јуни.
-Ќе бидат вклучени униите на средношколците, но исто така и синдикатите за мислењата да ги слушнат членовите на Комисијата. Мислам дека во рок од десет дена ќе имаме конечен став кој од предлозите ќе биде прифатен, изјави Шаќири.