Во Србија 299 новозаразени од коронавирус, починаа 7 лица
Државниот Кризен штаб денеска не ја одржа редовната конференција за новинари во 15 часот, а министерството за здравство и владата не ги соопштија причините за откажувањето.
Српските здравствени власти пријавија денеска уште 7 жртви од ковид-19 и уште 299 новозаразени од коронавирус, додека официјалната статистика бележи натамошен пад на бројот на хоспитализирани и релативно помал број на пациенти на респиратори.
На коронавирус во Србија во последните 24 часа се тестирани вкупно 10.033 примероци, а 299 биле позитивни, што значи дека вкупно досега се регистрирани 27.332 случаи на ковид-19.
Бројот на хоспитализирани пациенти е во пад веќе подолго од една недела – од 4.501 колку што имаше на 29 јули до 3.224 денеска, а помал е бројот на заболени на распиратори – од 162 пред седум дена до денешните 120, но епидемиолошките показатели и натаму се високи.
Србија, според официјалните податоци, од почетокот на епидемијата на 3 март вкупно тестираше 723.137 лица, а заклучно со 6 август има 27.332 регистрирани случаи и 621 жртва на коронавирус, и процент на смртност од 2,27.