Во Македонија нема загадени турски лимони
Агенцијата за храна и ветеринарство информира дека не добила известување преку Системот за брзо предупредување за храна и храна за исхрана на животни (РАССФ) на Европската унија дека се увезени небезбедни лимони од Република Турција
Безбедни се турските лимони и грејпфрутот, кои се продаваат, уверуваат од Агенцијата за храна и ветеринарство (АХВ) за „Слободен печат“. Медиумите од регионот, неодамна објавија, дека Системот за брзо предупредување за храна и добиточна храна (РАСФФ), објавил податоци со предупредување дека има нагло зголемување на бројот на испораки на лимони и грејпфрути од Турција кои ја надминале официјалната граница утврдена со регулативите на ЕУ за пестициди.
-Како контакт точка на Системот за брзо известување за небезбедна храна и храна за животни на ЕУ, до АХВ нема пристигнато нотификација за небезбедна пратка со агруми (лимони и грејпфрут) по потекло од Турција со наводи за содржина на поголемо ниво на пестициди над максимално дозволените граници – ни одговорија од Агенцијата.
Од АХВ истакнуваат дека инспекциските служби вршат континуирани контроли на домашниот пазар со овошје и зеленчук, како и на пратките кои се увезуваат во Република Македонија.
-Се контролираат магацини за чување на овошјето и зеленчукот, дистрибутивните центри и преработувачките капацитети. Дополнително, прометот со овошје и зеленчук се контролира и во пиљарите – велат од АХВ за „Слободен печат“.
Покрај редовните инспекциски контроли, Согласно препораките на Европската Унија за мониторирање на штетните агенси во храната, Агенцијата за храна и ветеринарство од 2012 година ја спроведува Програмата за мониторинг на безбедноста на храната.
-Целта на оваа Програма е одредување на евентуално присуство и на концентрациите на контаминентите во храната, како и евалуација на нивното влијание врз здравјето на човекот. Програмата е усогласена со европските програми за мониторинг, препораките на Светската здравствена организација. Мострите (вклучително и од овошје и зеленчук) се земаат во определен временски период, од определени региони, дефиниран тип и количина – објаснуват од АХВ.
Пролетоска инспекторите во Хрватска ги известија потрошувачите за отповикување на увезени лимони од Турција, поради воспоставениот пестицид хлорпирифос и дидецилдиметиламониум хлорид (ДДЦ). Хрватските инспектори објавија дека производот не е во согласност со Регулативата (ЕЗ) бр. 396/2005 на Европскиот парламент и Советот од 23 февруари 2005 година за максимални нивоа на остатоци од пестициди во или на храната и добиточната храна од растително и животинско потекло.
Во Македонија се увезуваат над 5 милиони килограми лимони, најчесто од Турција, Грција, Шпанија, Бразил и Италија. Годишната потрошувачка на е просечно семејство е 15 килограми лимони и 34,3 килограми портокали.