Владата ќе купува акции од акционерското друштво „Железници Транспорт“ вредни 15,6 милини евра со што повторно на краток рок ќе го спаси загубарот од банкрот.

Железници Транспорт планира да издаде акции што е четврти пат досега за што добила и одобрение од Комисијата за хартии од вредност.

Комисијата за хартии од вредност донесе Решение со кое на Железници Транспорт АД Скопје и даде одобрение да ја издаде четвртата емисија на акции по пат на приватна понуда.

„Со четвртата емисија, Друштвото ќе издаде 962.913 обични акции при што продажната цена по акција е еднаква со номиналната и изнесува 1.000 денари по акција. Вкупната продажна вредност на емисијата e 962.913.000 денари. Друштвото издава хартии од вредност заради зголемување на основната главнина, односно заради создавање услови за непречено функционирање. Приватната понуда е наменета за познат купувач, постојниот единствен акционер – Влада на Република Северна Македонија, како институционален инвеститор“, соопштија од Комисијата за хартии од вредност.

Ова државно претпријатие е редовен загубар и должник. Во првата половина од годинава загубите изнесуваат речиси 65 милиони евра.