Владата на Република Северна Македонија го осуди чинот на палење на возилото што го користел првиот заменик претседател на Владата, Артан Груби.

Во соопштението, од Владата посочуваат дека безбедноста е врвен приоритет во едно демократско општество, а палењето на возилото е акт на насилство кој е целосно неприфатлив и недозволив во едно демократско општество кое се залага за европски вредности.

Сите надлежни институции, истражните и судските органи, во рамките на своите надлежности постапуваат без одлагање, одлучно и професионално со цел целосно разрешување и расчистување на овој случај во најбрз можен рок – додаваат од Влада.

По веста за опожареното ауди во скопски Чаир, кое дел од медиумите го поврзаа со првиот вицепремиер Артан Груби, а за кое тој самиот не демантираше дека го користел иако се води на име на друго лице, вчера се огласи и министерот за надворешни работи и портпарол на ДУИ, Бујар Османи.

Османи и Бектеши со осуда за опожареното возило кое го возел Груби

Вицепремиерот Артан Груби вчера на Фејсбук објави статус во врска со опожареното возило што се поврзуваше со него, објаснувајќи преку извинување како стојат работите.

Им се извинувам на сите мои соседи во нашето маало за големата загриженост што ја доживеаја синоќа пред зградата во која живеам, од причините на мојата професија. Им се извинувам и на мојот пријател и на неговото семејство за штетата предизвикана исклучиво поради мојата професија.Во политиката сум за да служам и оставам траги со работа и дела, а не да ги тероризирам семејството, соседите и општеството. Континуираните закани и последователните напади ги сметам за кукавичлук и подмолно, но немам намера да се откажам и да се повлечам од работата и исполнувањето на очекувањата на граѓаните.

„Кукавици“- порака од Груби по инцидентот со запалениот автомобил

Од Министерството за внатрешни работи информираа дека има пријава за опожарено возило од Скопје, но на име на Б.Л.

Околу 03:30 часот пријавено е дека на ул.„Струмичка” настанал пожар во патничко возило „ауди” со скопски регистарски ознаки, сопственост и паркирано од Б.Л. (35) од Скопје, велат од МВР.