Десетина дена откако советниците на седница на Советот на Општина Карпош изгласаа дека повеќе нема да има темни улици низ населбите и донесоа одлука, по година и пол штедење, конечно да се укинат рестрикциите на уличното осветлување, поголемиот дел од улиците во општинска надлежност и понатаму се темни.

Граѓаните реагираат и се сомневаат дека градоначалникот Стевче Јакимовски не ја прифатил одлуката на Советот, па тие и понатаму ќе треба да се движат по уличките осветлувајќи пред себе со мобилни телефони, внимавајќи на уличните кучиња и стравувајќи дали нивните автомобили ќе бидат мета на крадците, на кои им одговара темницата.

Од Општина Карпош тврдат дека граѓаните не треба да се грижат, улиците ќе бидат осветлени, но дека постапката за повторно приклучување не може да се изведе одеднаш на сите улици.

Градоначалникот Стевчо Јакимовски ја потпиша одлуката на Советот на Општина Карпош за прекинување на рестрикциите на уличното осветлување. Екипите на општината веќе се на терен каде што вршат приклучување на исклучените светилки. Повторното приклучување се врши реонски, поради што ќе биде потребно извесен период за целосно вклучување на сите исклучени светилки – велат од Карпош за „Слободен печат“.