Кошаркарската репрезентација на Србија денеска убедливо ја совлада Доминиканска Република со 112:79 и така обезбеди пласман во четвртфиналето на Светското првенство.

Најефикасен во редовите на српската селекција беше Богдан Богдановиќ со 20 поени и седум скокови. На спротивната страна се истакна Карл Ентони Таунс кој реализираше 25 поени и имаше седум скокови.

Противник на Србите во четвртфиналето на Мундобаскет 2023 ќе им биде репрезентацијата на Литванија.

Литванците триумфираа со резултат 110:104 против САД што беше прв пораз за Американците на СП.

Прв стрелец за Литванија беше Ваидас Кариниаускас со 15 поени, а за САД недоволна беше одличната партија на Ентони Едвардс кој запиша 35 коша.

Четвртфиналната пресметка меѓу Литванија и Србија е закажана за 5 септември, а истиот ден репрезентацијата на САД за противник ќе ја има Италија.

Мундобаскет 2023

Четвртфинале, двојки –

5 септември
Италија – САД
Литванија – Србија

6 септември
Германија – Летонија
Канада – Словенија