Остана уште малку до стартот на Европското првенство кое официјално ќе започне на 11 јуни, а во продолжение ќе се потсетиме на почетокот на доминацијата на Шпанија и одличната партија на Давид Виља.

Ве враќаме на Европското првенство во 2008 година одржано во Австрија и Швајцарија. Во групната фаза „црвената фурија“ убедливо ја совлада Русија со резултат 4:1.

Шпанската репрезентација дојде на ова Европско првенство како еден од фаворитите за освојување на титулата, најмногу благодарение на нејзините квалитетни играчи во нападот. Чави Хернандез, Андрес Иниеста, Фернандо Торес и Давид Виља беа напаѓачките опции, додека на клупата беа Санти Казорла и Сеск Фабрегас.

На овој натпревар против Русија, сите погледи беа свртени кон напаѓачот Давид Виља, кој тогаш беше еден од најдобрите напаѓачи на светот. Во 20-та минута „Ел Нињо“ се проби по левата страна и ја додаде топката до Виља кој ја испрати во мрежата и донесе водство за Шпанија. Русите имаа свои шанси преку Роман Пављученко, но не дојдоа до реализација. Казната стигна во последната минута од првото полувреме кога расположениот Виља ѝ избега на руската одбрана, помина топката низ нозете на Игор Акинфеев за зголемување на предноста.

Хет-трикот беше комплетиран во 75 минута, Виља ја прими топката во шеснаесетникот, со дриблинг се ослободи од еден противнички играч за 3:0, за свој хет-трик на почетокот на шампионатот и што е најважно за историја на Европското првенство.

Русите успеаја да постигнат утешен гол во 86-та минута преку Пављученко, кој со глава ја затресе мрежата на Шпанците, а конечниот резултат го постави Фабрегас за 4:1.

ВИДЕО: Најстарото ривалство во фудбалот и незаборавниот гол на Пол Гаскоњ!

Ова беше само почеток на шпанската доминација. На крајот тие го освоија Европското првенство во Австрија и Швајцарија со победа во финалето против Германија, а голот на одлуката го постигна Фернандо „Ел Нињо“ Торес во победата од 1:0.

Истиот трофеј го одбранија на ЕП 2012 година кога во Киев (Украина) со убедливи 4:0 во финалето ја совладаа Италија.

ЕВРО 2020: Можеби последна шанса за „златната“ генерација на Белгија!