ВИДЕО: Ѓоковиќ во полуфиналето на Мастерс турнирот во Париз
Српскиот тенисер Новак Ѓоковиќ се пласираше во полуфиналето на Мастерсот во Париз, откако во четвртфиналето денеска го совлада Лоренцо Мусети со 2:0 во сетови (6:0, 6:3) за 75 минути игра. Во полуфиналето Ѓоковиќ ќе игра против подобриот од мечот Стефанос Циципас (Грција) – Томи Пол (САД).
Првиот сет српскиот ас го заврши за само 24 минути. Еден од најдобрите играчи во историјата на овој спорт дури трипати направи „брејк“ на сервисот на противникот. Вториот сет започна идентично како и првиот, но Мусети се „разбуди“ и рано направи „брејк“, поведувајќи во гемови со 2:1.
Но, пресуди искуството на Ѓоковиќ кој одлично сервираше во вториот сет, а Мусети направи вкупно 28 неизнудени грешки. 35-годишниот Србин ја брани титулата во Париз, каде го држи рекордот со шест освоени трофеи, а во полуфиналето стигна без загубен сет. Претходно со максимален резултат ги совлада Максим Креси и Карен Хачанов.
Во второто полуфинале се среќаваат Холгер Руне од Норвешка и Феликс Оже-Алијасим од Канада. Норвежанецот успеа да го елиминира Карлос Алкараз, при резултат 3:6, 6:6 Шпанецот поради повреда го предаде мечот, додека Оже-Алијасим со 6:1 и 6:4 го елиминираше Американецот Френсис Тиафо.
Полуфиналните мечеви се закажани за в сабота, додека финалето ќе се игра в недела.