На 18 мај, на скверот „Јас и ти“ во Дебар Маало во Скопје, ќе се реализира проектот „Триптих“, кој претставува спој на три видови уметност. Учесниците Дуња Иванова, Јована Зајкова и Горазд Китановски ќе ги обединат современиот звук за пијано и танцот преку мислата на Горан Стефановски.

„Мотивот за ова дело беше мислата на исклучителниот, единствен, водечки современ македонски драматург и потребата неговиот израз да се поврзе со други форми на уметност, во овој случај музиката и современи композитори кои јас во изминатите десетина години сакам да ги изведувам пред публиката. Тоа се композитори припадници на постминимализмот, дела од филмското платно и секако како идеја се наметнаа и тендециите во современата танцова уметност на експресиите на телото односно говорот заменет со гестакулација. Репертоарот е еден колаж од делата на Макс Рихтер, Јан Тирсен, потоа една преработка на песна од бендот „Редиохед“ од аранжерот Џош Коен, кој е исклучителен современ пијанист, тука се и делата на уште неколку припадници на постминимализмот. Ќе настапиме заедно со Јована Зајкова која е танчарка и кореографка и Горазд Китановски, поет, кој ќе говори делови од драмите на Горан Стефановски“, вели за Утрински брифинг, Дуња Иванова, пијанистка.

Таа вели дека од сите уметности, музиката е најпацифистичкиот начин нештата да се менуваат и затоа сака да ја изложи уметноста на улица за да ги научи да излезат надвор од формата и да ја восприемат сега и тука, не да се подготвуваат за неа и притоа да истражуваат во нејзините длабочини за да ја користат како најмоќно оружје за менување на нештата.

За повеќе од разговорот погледнете го видеото.