Урсула му се јави на Румен: Поддршка за Бугарија да влезе во шенген-зоната
Претседателката на Европската комисија, Урсула фон дер Лајен, во телефонски разговор со претседателот на Бугарија Румен Радев ја изразила својата поддршка за влезот на Бугарија во шенген-зоната, соопшти прес-службата на претседателската администрација.
Фон дер Лајен ги издвоила резултатите што ги постигнала Бугарија во заштитата на границите на Европската унија и покрај силниот миграциски притисок. Во разговорот, Радев изразил очекување дека резултатите од заштитата на границите ќе бидат препознаени од сите европски партнери и дека Бугарија што поскоро ќе се приклучи на шенген-зоната.
Според бугарскиот претседател, поврзувањето е од клучно значење во услови на криза и прекинати или сериозно попречени синџири на снабдување, затоа олеснувањето на комуникацијата меѓу земјите-членки на Европската унија во Југоисточна Европа преку проширување на Шенген зоната треба да биде приоритет. Радев и фон дер Лајен разговараа и за активностите што ги презема официјалната влада на Бугарија за справување со последиците од економската криза за граѓаните и бизнисите и за гарантирање на макроекономската и финансиската стабилност.
Вицепремиерот и министер за внатрешни работи Иван Демерџиев денеска соопшти дека во Брисел разговарал со министерот за внатрешни работи на Австрија Герхард Карнер, со претставникот на Шведска и со комесарот за внатрешни работи на ЕУ, Илва Јохансон, околу прашањето за приемот на Бугарија во шенген-зоната. Јохансон ја советуваше Бугарија да ги вложи „сите потребни напори“ до 8 декември, кога ќе се гласа за проширување на шенгенските граници со Бугарија, Романија и Хрватска.