УНЕСКО бара Венеција да се додаде на листата на загрозено светско наследство
Организацијата на Обединетите нации за образование, наука и култура (УНЕСКО) препорача Венеција да биде додадена на листата на загрозени градови од светското наследство, јавува Си-Ен-Ен.
Организацијата ја повика италијанската влада да „обезбеди најголема посветеност“ за решавање на „долгогодишните проблеми“ во Венеција, кои се таложат со години, а градот се бори со пренатрупаноста и негативни ефекти од климатските промени.
Во нацрт-резолуцијата се тврди дека нема „значителен напредок во решавањето на постојаните и сложени прашања поврзани со масовниот туризам, развојните проекти и климатските промени“.
Се додава дека овие проблеми предизвикуваат „влошување и оштетување на урбаните средини, деградација на културниот и социјалниот идентитет и загрозување на интегритетот на нејзините културни, еколошки и пејзажни атрибути и вредности“.
Венеција е еден од 1.157 градови кои моментално се означени како места на светско наследство, кои имаат „извонредна универзална вредност“ поради нивните културни или природни понуди.