Многу српски семејства годинава останаа без автомобил додека беа на одмор во Грција. Имено, како што се рашири на социјалните мрежи, на многу луѓе им се украдени превозни средства, а една од жртвите објасни за Телеграф.рс како се одвивала драмата во странство. Според нивниот соговорник, автомобилот „киа“ бил украден на почетокот на јули, а грчката полиција го вратила во непрепознатлива состојба.

-Украдена е на 4 јули во Солум пред продавницата Џамбо, на враќање од одмор застанавме кај продавницата, кога завршивме со шопинг автомобилот исчезна. Го скршиле стаклото од совозачката страна, го вклучиле автомобилот и се оддалечиле. Пред 3 недели дознавме дека е пронајден. Автомобилот не беше комплетно осигуран, така што целата штета е на мене. Направивме мало истражување, и ни рекоа дека претежно се крадат големи автомобили за да се превезуваат мигранти – вели нашиот соговорник.

Како што објаснува, во Србија морал да се врати со шлеп, а автомобилот поминал дури 2.500 километри пред да биде вратен.

-Кога беше украдена колата, за среќа, документите од семејството беа сите кај мене, па лесно најдовме превоз со комбе назад во Србија. Среќа што крадците доживеале несреќа и го оштетиле автомобилот, па го оставиле и избегале. Колата е во возна состојба, но треба да се инвестира додека не се поправи. И тоа е подобро од нов автомобил – забележува Србинот.

Како што појасни, сака да привлече внимание и на други лица кои поминале низ слична или иста ситуација и наведува дека видел уште три автомобили со српски регистарски таблички кои се пронајдени.

Да потсетиме, ова не е ниту прв ниту единствен случај на кражба на автомобили во Грција. Пред само неколку дена од српско семејство беше украдено БМВ Х3.

-Отидовме во полиција, дадовме изјава, ќе го известат Интерпол, беа љубезни. Постиравме на сите групи на „Фејсбук“, каде што најмногу ни кажаа дека колата е веќе во Албанија. Истото се случи две куќи од нас на некои Македонци. Нашиот одмор ни беше скратен… се враќаме утре, на таблети за смирување сум – рекла Србинката.