Во синоќешното гостување во емисијата „Топ Тема“ на телевизија „Телма“, директорката на УЈП Сања Лукаревска, изјави дека повеќе од 300 инспектори контролори на УЈП се во инспекциски надзор во 84 објекти на КАМ маркетите заради регистрирани неправилности.

„Согласно она што го утврдивме од теренските контроли во изминативе два дена, сметаме дека во интерес на граѓаните и во интерес на ова што значи зачувување на стандардот, имаме обврска – професионална и морална, да постапуваме“, изјави Лукаревска синоќа во „Топ тема“.

„Во моментов повеќе од 300 колеги од Управата за јавни приходи се во сите подружници на КАМ маркетите, заради утврдени соодветни неправилности“, додаде таа.

Синоќа, УЈП превентивно ги затворила сите КАМ маркети во државава. Сепак, не станува збор за запечатување на ланецот маркети, туку поставените жолти ленти биле затворање од превентивен карактер односно од вечерта до утрото, за да не може да се менува фактичката состојба во објектите и документите, за утрово контролата повторно да продолжи.