Во првиот денешен натпревар во рамки на седмото коло во Серија А, Удинезе продолжи со одличните игри и го победи Интер со 3:1 и привремено се искачи на првото место на табелата.

Ова беше петта победа по ред за Удинезе за кого настапува и Илија Несторовски, но популарниот „Нестор-гол“ триумфот над Интер го проследи од клупата за резервни играчи.

По отворањето на сезоната во Серија А со само еден бод во првите две кола (пораз од Милан со 4:2 и со Салернитана 0:0), Удинезе нанижа пет победи и тоа над Монца, Фиорентина, Рома, Сасуоло и еве денеска Интер.

Интер поведе на „Фриули“ уште во петтата минута по одлично изведениот слободен удар на Николо Барела. Домаќините до крајот на првиот дел успеаја да дојдат до израмнување и тоа по автоголот на Милан Шкрињар во 22. минута.

Предност на тимот од Удине донесе словенечкиот фудбалер Јака Бијол во 84. минута, додека точка на натпреварот стави Толгај Арслан во третата минута од судиското продолжение.