Турција ги осуди коментарите на Макрон
Официјална Анкара ги осуди неодамнешните изјави на францускиот претседател Емануел Макрон за Турција и нејзиниот лидер, нарекувајќи ги неприфатливи.
Портпаролот на турското Министерство за надворешни работи Хами Аксој рече дека изјавата на францускиот претседател Макрон е спротивна на пријателството и сојузот меѓу двете земји и е неприфатлива.
Аксој исто така рече дека се работи за „неправедни и недоследни” изјави во врска со турскиот претседател Реџеп Таип Ердоган и Турција.
За време на интервју емитувано на ТВ каналот Франс 5 во вторникот, Макрон рече дека Турција „се обидува да се меша” во претседателските избори во Франција планирани за 2022 година.
– Сметаме дека изјавите на господин Макрон се недоследни во момент кога преземаме чекори да тензијата во односите меѓу двете земји да ја замениме со смиреност и пријателство, нагласи Аксој.