Баерн Минхен вчера беше поразен од Борусија Менхегладбах со 2:3, а клучен момент во натпреварот веројатно беше црвениот картон на Дајот Упамекано по само осум минути игра. Во центарот на вниманието на германските медиуми по натпреварот е тренерот на баварците, Јулијан Нагелсман.

Наводно, Нагелсман беснеел по последниот судиски свиреж, а прво им се нафрлил на судиите на кои им се развикал пред новинарите во микс-зоната. Откако арбитрите ги игнорирале неговите зборови, Нагелсман со тупаница удрил во вратата од соблекувалната на делителите на правдата и се обидел да влезе.

Сепак, откако бил спречен од присутните ги нарекол „безрбетници“ и си заминал. Набрзо, на прес-конференцијата Нагелсман сфатил што направил и дека неговото однесување не било во ред, па се извинуваше.

„Ова е фудбал, а емоциите се дел од спортот. Сакам да се извинам на судијата Тибијас Велш и неговите помошници. За жал претерав“, изјави Нагелсман.

Поразнот на Баерн е прилика за Унион Берлин кој ако денес слави против Шалке на домашен терен ќе го преземе лидерското место на табелата.