Министерката за труд и социјална политика Јованка Тренчевска оствари средба со претставници на СОС Детско село на која се разговарало за активностите што се имплементираат во делот на грижата за децата без родители и родителска грижа, за згрижувачките семејства и за поддршката на младите над 18 години.

Тренчевска, како што информира ресорното Министерство, посочила дека грижата за овие деца треба да биде континуирана и стручна за да можат тие да излезат од системот на социјален ризик.

– Пред нас е предизвикот за мобилизирање на што поголем број на згрижувачки семејства. Во таа насока наскоро заедно со УНИЦЕФ ќе започнеме кампања за промовирање и зајакнување на згрижувачките семејства. Очекуваме со ваквата активност да се зголеми интересот на граѓаните кои сакаат да станат згрижувачи на деца. Згрижувачките семејства на децата без родители и родителска грижа, со попреченост, децата – жртви на насилство се најдобриот начин на децата им се обезбеди грижа, љубов и посветеност, нагласила Тренчевска.

Претставниците од СОС Детско село ја поздравиле намерата со кампања да се подигне интересот кај граѓаните за да станат згрижувачи на деца. Посочиле дека еден од начините е да се унапредат законските решенија поврзани со алтернативната грижа за деца и млади. Со проектот „Унапредување на системот на социјална заштита и поддршка на процесот за деинституционализација”, невладината организација очекува системска поддршка за помош на младите по напуштањето на СОС Детско село.