Иако сегашната истрага за „Двојник“ се води и внатре во МВР, но и надвор кон други институции, досега не е утврдена организирана група во случајот. Единствената врска меѓу сите во случајот е Раиф Мифтари посредникот меѓу нив, за кој е распишена и меѓународна потерница. Екс-министерот за внатрешни работи и сегашен пратеник, Павле Трајанов вели дека за да функционира целата оваа криминална група треба најмалку двајца.

– За да функционира тоа треба најмалку двајца. Тој што ги прима барањата за издавање пасоши и тој што ги контролира. МВР има систем, управни служби кои треба да ја надгледуваат работата на подрачните единици, во СВР Скопје и другите како функционираат, има ли проблеми, пропусти…, и тие констатираат има или не пропусти и даваат насоки како да се подобрат работите. Тоа е една работа. Тие што се вклучиле во фалсификат треба да сносат одговорност. Оперативните служби, тие треба да соберат информаци бидејќи на овој начин е загрозена националната безбедност. Оперативните служби во МВР, Агенцијата за национална безбедност, Агенцијата за разузнавање треба да соберат факти, информациа и да се направи продлабочена проверка на каков и кој начин се издале пасошите – вели за Слободен печат, Трајанов.

Не верувам, додава Трајанов, дека овие 215 луѓе меѓу кои и познати криминалци од светски калибар, не комуницирале меѓу себе, преку интернет, праќале фотографии, доаѓале тука или не, сето тоа се движело и тоа требало службите, и наши и странски, да го сигнализираат.

-МВР треба да ги стонира сите пасоши што се издавале, да не може истите да се користат и преку Интерпол да се праќа информацијата дека тој и тој пасош се фалсификувани и да се сторнираат со име и презиме. И за нив е завршена работа, не може да се користат. Ова може да се направи и сигурно веќе е направено. Криминалот не распознава етнички бои, четири Македонци, четири Албанци или пет со тој што е избеган. Тие се договориле и добро функционирале, како старата максима „Братство единство“ терале за пари – вели Трајанов.