Помеѓу македонската и јапонската економија договорени се три нови иницијативи за економски раст. Како што соопштија од ТИРЗ, директорот Јован Деспотовски и претседателот на Јапонската организација за надворешна трговија JETRO договориле соработка не само во делот на привлекување на јапонски инвеститори туку и заднички проекти меѓу компании од двете земји особено во ИТ секторот, енергетика и градежништво во делот на обнова на Украина, како и директна поддршка за македонските стартапи

JETRO има мрежа која покрива над 2 милиони јапонски мали и средни компании и им нуди различни инструменти за поддршка за инвестиции, изјави Деспотовски.

Претседателот на JETRO Нобутани изразил целосна подготвеност за поддршка на ТИРЗ и Владата на Северна Македонија и лична заложба за забрзана реализација на новите иницијативи за засилен економски раст.

Директорот на ТИРЗ е во неколкудневна работна посета на Јапонија организирана во соработка со Јапонската амбасада во Северна Македонија. Целта е презентација на инвестициските можности во нашата земја. Деспотовски имаше средби со неколку од поголемите стопански комори, бизнис асоцијации, компании и државни институции на оваа земја.

Како што информираат од ТИРЗ, Деспотовски имал средба и со гувернерот на јапонската Банка за меѓународна соработка ( JBIC), Нобумитсу Хајаши со кој договорија подрршка на потенцијални заеднички проекти на македонски и јапонски градежни компании во рамки на обновата на Украина. Гувернерот Хајаши изрази подготвеност за поддршка на вакви инвестиции.