Хрватската пејачка Тереза Кесовија била хоспитализирана на Клиниката за инфективни болести „Д-р Фран Михаљевиќ“ во Загреб, пишува „Јутарњи лист“.

Музичката дива се соочила со неподносливи болки во десната нога и одлучила да побара лекарска помош.

„Подобро е, веќе не ме боли толку многу. Сѐ ќе биде добро благодарение на прекрасните лекари и медицинските сестри. Побарав лекарска помош во моментот кога болката стана неподнослива и кога неможев да спијам поради неа“, раскажала Кесовија.

Откако ја прегледале, лекарите ѝ рекле дека лекувањето мора да продолжи во болница, за да ѝ се излечи тешкото воспаление на поткожното ткиво на десната нога.

„Искрено, не ми беше драго да го слушнам тоа. Јас се надевав дека лекувањето ќе може да помине без хоспитализација, но им верувам на лекарите и имам голема почит за нивната напорна работа. Затоа ги послушав, се спакував и дојдов во болница пред неколку дена“, споделила пејачката.

И покрај сѐ, Кесовија е добро расположена, а нејзиниот оптимизам, по кој е позната, не ја напушта.

„Јас сум во најдобрите раце, а и самата гледам дека состојбата се подобрува. Се разбира, сѐ уште ја чувствувам болката, што е сосема нормално. Морам да пијам лекови и да ја ‘спасам’ таа нога, но сега сѐ е подобро“, вели таа.