Филип Талески на 14 години дебитираше во СЕХА – Газпром лигата и ЕХФ Лигата на шампионите. На 19 години веќе го направи својот прв меѓународен трансфер. Сега се врати во татковината и е меѓу најдобрите играчи, не само во Вардар, туку и во целата домашна лига во Македонија и во репрезентацијата.

Во својата кариера имаше можност да работи со познати имиња како Лино Червар, Николај Јакобсен, Веселин Вујовиќ и Давид Дејвис.

Но, тој навистина „експлодираше“ и ја потврди играчката зрелост со Владо Недановски. Сега Филип Талески е „првата виолина“ во Вардар. Лев бек со силен шут, а кога на тимот не му оди секогаш има решение. Тој е комплетен играч кој не само што игра во нападот, туку и во одбраната.

Вардар сезонава повторно имаше промени во тимскиот ростер. Заминаа многу играчи, пристигнаа и неколку нови. Сега ростерот е различен, но менталитетот остана ист.

– Силата на Вардар е токму тој менталитет. Шампионскиот дух сè уште живее во соблекувалната. Тоа го чувствувам преку Стојанче Стоилов. Низ сè, секое негово движење. И во соблекувалната и во салата и сите оние плакати што постојат во ходникот во салата, пред влезот во соблекувалната. Вардар е европски првак и така треба да биде – се зборовите на Талески.

Целото интервју на Филип Талески за СЕХА Газпром лигата можете да го прочитате на следниот линк ТУКА