Светската здравствена организација (СЗО) соопшти дека бројот на новозаразени со коронавирусот на глобално ниво се намалува трета недела по ред.

Генералниот директор на СЗО, Тедрос Аданом Гебрејесус, оцени дека новиот тренд покажува оти е можно да се контролира вирусот со примена на мерки како физичко растојание, покривање на лицето и одржување на хигиена, иако се појавуваат нови видови.

Сепак, Тедрос истакна дека светот веќе бил во слична ситуација и посочи дека не е време за опуштање.

– Во текот на изминатата година, имаше моменти кога бројот на регистрирани случаи се намалуваше во скоро сите земји . Мерките за претпазливост беа олабавени, а потоа вирусот ќе продолжеше да беснее, потсети Тедрос.

Тој нагласи дека во моментот кога се врши вакцинирање на глобално ниво, потребно е да се применат мерки на претпазливост кои придонесуваат за безбедноста на луѓето, пренесува Гласот на Америка.

– Контролата на ширење на вирусот придонесува за спасување на животи и ги намалува шансите за појава на нови видови. Исто така, помага дејството на вакцините да биде поефикасно, рече тој.