Со чамец шверцувале свинско месо од Србија, приведени тројца Косовци
Косовската полиција уапси три лица кои со чамец шверцувале свинско месо од територијата на Србија на територијата на Косово. Полицијата соопшти дека во вторникот вечерта бил забележан чамец како се движи во Ујманското Езеро.
Откако чамецот застанал, пријавените зеле 4 вреќи свинско месо тешки 40 килограми и ги ставиле во објект во близина на локацијата каде што застанале.
Полицијата соопшти дека го одземала месото и моторот на чамецот, а осомничените се приведени во полициска станица поради шверц на стока. Потоа се пуштени, а одземената стока е предадена на косовската царина.
„При надзор на Ујманското езеро, забележан е чамец за кој постоело сомневање дека се префрлил од територијата на Србија на територијата на Република Косово. При набљудувањето, забележани се и сомнителни лица кои излегле од чамецот, кои натовариле 4 вреќи свинско месо во количина од околу 40 килограми, кои ги внеле во објект на таа локација. На местото на настанот излегле полициски единици, при што месото и моторот од чамецот се одземени, додека 3-ца пријавени се приведени во полициска станица. По консултација на обвинителот истите се пуштени , додека одземената стока е предадена на косовската царина“, се наведува во соопштението на полицијата.