Скопските полицајци годинава фатиле близу 300 криминалци-бегалци
Во текот на 2021 година, скопската полиција фатила речиси 300 бегалци по кои биле распишани национални и меѓународни потраги: осудени лица со казна затвор, лица под истрага со определена мерка притвор, лица под истрага, избегани од казнено-поправни установи, за кои се распишувани национални и меѓународни потраги, соопшти МВР.
„Од страна на Оперативниот тим – потраги приведени се 102 лица за издржување на вкупна казна затвор 269 години и 6 месеци и за доиздржување на преостанат дел од казната затвор во траење од 204 години и 11 месеци“, се вели во сооопштението.
Организационите единици во рамки на СВР Скопје презеле оперативно-тактички мерки за да пронајдат и уапсат бегалци, при што се приведени 195 лица за издржување на вкупна казна затвор 210 години и 9 месеци и за доиздржување на преостанатиот дел од казната затвор во траење од 22 години, 11 месеци и 27 дена.
Во текот на 2021 година редовно се прибираа и сознанија за лица по кои се трага, а се наоѓаат надвор од државата и во содејство со МВР Интерпол и МВР потраги беа екстрадирани 32 лица за кои има распишано меѓународни потерници, додаваат од МВР.