Поранешниот премиер Никола Груевски, првоосомничен во истрагата „Феникс“, поврзана со малверзации околу спомениците од проектот „Скопје 2014“, во која тој и други се товарат за злоупогтреба на службената положба и за перење пари, се огласи од Будимпешта, каде избега без да се соочи со правдата за други дела, за кои беше осуден во отсуство.

Груевски на Фејсбук напиша дека истрагата е „резултат на исплашеност на политичари на чело со поренашниот премиер Зоран Заев“, како и дека спомениците и проектот „Скопје 2014“ „биле создавани со љубов“.

Во карактеристично опширниот статус, само дел се однесува на оваа тема:

„Правосудниот систем на власта е претворен во инструмент и алатка за дефокусирање од криминалите на поединци од власта и за политичка елиминација на политичките неистомисленици, а во прв ред оние во кои народот има некаква доверба, пред сѐ заради страв. Така, денеска обвинителството соопштило дека од 2016 година, односно 7 години води некаква истрага која не е им била завршена, а од наративот на обвинителот и нема најава дека брзо ќе заврши, а се однесува за дел од проектите на т.н. проект Скопје 2014 односно за 11 споменици и објавиле листа на осомничени, лица во кои се сомневаат, а за неколкумина дури побарале притвор, што во пракса за ова контролирано правосудство значи и дека ќе добијат мерка притвор. Зад оваа постапка стојат исплашени политичари, на чело со Заев кој и понатаму има огромно влијание во правосудниот систем и нему блиски луѓе од политиката, од неговата партија СДСМ, но и од други партии“, пишува меѓу другото осомничениот Груевски.

Кривичниот суд вечерва им изрече мерки ефективен притвор од 30 дена на тројца осомничени во случајот, меѓу кои и на поранешниот претседател на Советот на Општина Центар, Владимир Здравев и на неговиот брат, додека ексградоначалникот на Центар, Владимир Тодоровиќ доби мерка куќен притвор, исто како уште еден осомничен во случајот.

Тодоровиќ оди во куќен притвор, вели дека не се чувствува виновен