Унгарија ќе го повлече своето противење за влез на Бугарија во европската Шенген зона за слободно движење штом официјално биде објавена одлуката на Парламентот во Софија за укинување на данокот за транзит на руски гас, изјави денеска унгарскиот министер за надворешни работи Петер Сијарто, пренесува Бета.

„Вчера бев информиран од мојот бугарски колега дека бугарскиот парламент го укина тој закон“, рече Сијарто во видеото на неговата Фејсбук страница, пренесува Ројтерс. Тој рече дека кога законот ќе биде објавен во службениот весник на Парламентот во петок – очекувано – Унгарија ќе се откаже од своето противење за прием на Бугарите во Шенген зоната и ќе побара од Европската комисија да ја прекине процедурата што ја започна Будимпешта. Бугарија во октомври годинава воведе транзитна такса од 10 евра за мегават час за рускиот гас, што наиде на критики од Унгарија, чиј министер за надворешни работи го нарече „непријателски“ потег.

Унгарското Министерство за надворешни работи минатиот викенд објави дека ќе стави вето на влезот на Бугарија во Шенген зоната доколку данокот на гас остане на главната увозна рута за Унгарија. Бугарскиот парламент вчера донесе одлука за укинување на данокот за увоз и транзит на руски природен гас низ Бугарија. Шенген зоната на слободно движење вклучува 23 од 27 земји на Европската унија, како и Швајцарија, Норвешка, Исланд и Лихтенштајн.