Секое трето училиште во светот нема пристап до вода за пиење, велат од УНЕСКО
Речиси секое трето училиште во светот нема пристап до чиста вода за пиење и основни санитарни услови, се вели во соопштението на Организацијата за образование, наука и култура на Обединетите нации (УНЕСКО). Учениците подобро учат во безбедни и здрави училишта, изјави директорката на УНЕСКО Одри Азулеј.
Сепак, многу училишта сè уште ги немаат потребните капацитети за здравјето на учениците, рече таа. Затоа УНЕСКО апелира до меѓународната заедница да ги поддржи земјите кои не можат да обезбедат такви услови. Според податоците, речиси 584 милиони деца во моментов имаат само ограничен или никаков пристап до чиста вода за пиење и санитарни услови. Околу 40 отсто од нив живеат во субсахарска Африка.
УНЕСКО наведува дека мерките за здравјето и исхраната на учениците доведуваат до тоа децата почесто да доаѓаат на училиште и да престојуваат таму. Само редовните оброци во училиштата веќе ја зголемија стапката на упис во училиштата за 9 проценти.