Руско МНР: Германија масовно протерува руски дипломати, Москва ќе одговори со иста мерка
Германските власти одлучија масовно да протеруваат руски дипломати, соопшти денеска руското Министерство за надворешни работи и додаде дека Москва ќе одговори со иста мерка.
„Руската страна одлучи да одговори со иста мерка и да протера германски дипломати од Русија, како и значително да го ограничи максималниот број на вработени во германските дипломатски претставништва во Русија, а на 5 април Министерството за надворешни работи на Русија за својата одлука и официјално го информира германскиот амбасадор во Русија”, пишува во соопштението.
Руското МНР додава дека е индикативно тоа што германската страна, и покрај уверувањата дека нема да ги информира медиумите за ова прашање, го прекршила ветувањето па претставниците на медиумите „редовно ги користела за организирање на контролирано протекување информации за масовното протерување руски дипломати”, пренесува ТАСС.