Фудбалската репрезентација на Македонија в четврток (20.45) ги продолжува настапите во Лигата на нации, а противник е селекцијата на Грузија која е лидер на табелата во групата 4 од дивизијата Ц.

Грузијците во првите две кола остварија две убедливи победи, од 4:0 над Гибралтар и од 5:2 против Бугарија на гости, додека избраниците на селекторот Благоја Милевски имаат учинок од една победа (Гибралтар 2:0) и едно реми (Бугарија 1:1).

Македонија првите два натпревари ги одигра на гости и против Грузија за прв пат ќе игра пред македонските фанови на Националната Арена „Тодор Проески“, а напаѓачот Милан Ристовски очекува тежок и борбен натпревар и победа на Македонија.

– Го покажавме нашиот квалитет на првите два натпревари. Сметам дека можеме многу повеќе и тоа ќе го покажаме на следниот натпревар против Грузија. Двете победи се од големо значење за самодовербата на Грузија и сигурно дека тоа ќе биде тежок натпревар бидејќи тие ќе дојдат мотивирани да се борат против нас за првото место. Меѓутоа ние веруваме во нас и во замислата на селекторот. Ќе покажеме желба и борба и ќе дадеме се од себе. Ние гледаме напред од меч во меч. Направивме кратка анализа на нивната игра и знаеме што не очекува кои се нивните посилни страни. Треба да се концентрираме на нашата игра и на нашата офанзива и се надевам дека ќе успееме во четврток. Мора да веруваме во нас и во нашето заедништво и тимски дух кој сме го покажале и се надевам дека ќе го покажеме повторно в четврток – смета Ристовски.