На европската лотарија „Еуроџекпот“ двајца среќни добитници од Словенија и Германија освоија по 60 милиони евра откако ја погодија добитна комбинација од седум броеви.

Ова е најголемата добивка на лотарија во историјата на Словенија, а од 60-те милиони евра, непознатиот среќен добитник ќе добие 51 милион, додека девет милиони евра ќе бидат исплатени за даноци на општината во која живее, пренесува словенечкиот портал „24УР“.

„Нечиј сон се оствари во Словенија. Џекпотот од 60 милиони евра е уплатен на ‘лотерија.си’“, објавиле на веб-страната на лотаријата.

Добитната комбинација на броеви беше 2, 3, 6, 15, 35, со дополнителни броеви 1 и 3.

Досега рекордот во Словенија беше во рацете на еден среќник од Жалец, кој во 2014 година доби џекпот вреден 28,2 милиони евра. Откако ќе се одземе данокот среќникот завршил со 24 милиони.