Прв смртен случај од ковид на Гренланд: Властите веднаш воведоа мерки
Властите на Гренланд им забранија на невакцинираните лица да пристапуваат до јавните простори по првиот смртен случај од ковид 19 во земјата.
Само целосно вакцинирани граѓани ќе можат да влезат во ресторани, фризерски салони, продавници во кои не се продаваат намирници и други слични производи. Властите соопштија дека целта на мерката е „да се спречи ширењето на инфекцијата од училишните деца на остатокот од општеството“, објави данската телевизија „ТВ2“.
Гренланд воведе ограничувања на локално ниво за време на пандемијата за да го спречи ширењето на болеста, а оваа есен островот имаше неколку жаришта и покрај солидната стапка на вакцинација.
Секоја смрт е трагична. За жал, ние во оваа земја сме во фаза на епидемија каде што се очекува болеста да одземе човечки животи и да се развива на ист начин како и низ светот, рече шефот на националната здравствена служба Хенрик Хансен.
Досега на јавните настани и простори можело да се влезе само со негативен тест, но тоа веќе не е можно.