Србин носел снајпер во патна торба, го уапсиле на аеродромот во Ниш
Цариниците во соработка со полицијата, на аеродромот „Константин Велики“ во Ниш пронашле снајпер, уред за дигитален надзор и термичка камера во патната торба на еден патник, српски државјанин, јавија локалните медиуми.
Српски државјанин (47) кој допатувал од Дортмунд, бил претресен од царински службеници на зелениот пункт откако рекол дека нема што да пријави, соопшти Царинската управа.
При детален преглед е пронајден снајпер, уред за дигитален надзор со придружната опрема и термичка камера, чија вкупна вредност, врз основа на пронајдените сметки, се проценува на околу 4.000 евра, јави Танјуг.
По пронаоѓањето на робата, патникот рекол дека е ловџија и дека не знаел дека требало да ја пријави својата опрема, се додава во соопштението.
Против него е поведена прекршочна постапка пред надлежен суд и спорната стока е одземена.