Промена во Битола: Си замина Секуловски, Бабунски нов тренер на Пелистер!
Попладнево битолски Пелистер потврди дека се разделува со тренерот Марјан Секуловски и на негово место пристигнува Бобан Бабунски.
Бабунски во првиот дел од сезоната ја предводеше прилепска Победа од каде што си замина поради финансиската криза во клубот.
ФК Пелистер ги известува своите симпатизери и навивачи дека спогодбено го раскина договорот со шефот на стручниот штаб Марјан Секуловски . Шест месеци пред истекот на договорот двете страни спогодбено се разделуваат по една година помината заедно. Клубот му се заблагодарува на Секуловски и неговиот стручен штаб за професионалноста , посветеноста и стручноста во уште една прилика што излезе во пресрет на матичниот клуб.
Нов шеф на стручен штаб е назначен Бобан Бабунски кој се обврза на договор до јуни 2023 година со опција за продолжување на соработката за уште една сезона ако клубот избори промоција во Првата фудбалска лига. Бабунски е на возраст од 54 години и е добро познато име, поранешен македонски и југословенски репрезентативец и селектор на сениорската и младинската репрезентација на Македонија, соопштија од ФК Пелистер.
Во својата тренерска кариера покрај Победа, Бабунски беше тренер уште на Вардар и Работнички. Неговото претставување и почеток на подготовки е закажано за понеделник деветти jануари 2023 година.