Копродукциската претстава „Нема да биде крај на светот“ на Македонскиот народен театар, „Перипетија продукција“ – Скопје и Сараевскиот воен театар „Сартр“ – Сараево, на 24 октомври гостува на Интернационалните театарски средби Брчко Дистрикт, БиХ, насловени под слоганот „Болест на општеството“.

Во официјалната фестивалска програма, која почна на 20, а ќе заврши на 28 октомври, покрај нашата театарска куќа, опфатени се и театри од регионот, меѓу кои: Сатирично казалиште „Керемпух“ и Градско драмско казалиште „Гавела“, Загреб – Хрватска, Црногорско народно позориште и Центарот за култура во Тиват – Црна Гора, Босанско народно позориште, Зеница – БиХ, „Ателје 212“ – Белград и Српско народно позориште, Нови Сад – Србија и други.

Театарските средби во Брчко се основани пред 49 години, а во својата речиси половина век долга традиција, средбите ги променија правилата и предлозите за организација, продукција, структурата на оценувањето и наградувањето на претставите и поединците, како и начинот на селекција и избор на изведби.

Според селекторот, проф. Владо Керошевиќ, од оваа година тоа се „Интернационални театарски средби“, на кои можат да учествуваат сите театри од БиХ и од странство, со квалитетни претстави без разлика на јазикот на кој е напишан или изведен драмскиот текст, извести Мила Анѓелковиќ од РСМ НУ Македонски народен театар.