Покрај барањето на адвокатот Мерџан Даути за тоа случајот „ТНТ“ да се преведе на албански, тоа нема да се случи. Напротив, судијата во оваа постапка побара и отпочнување на дисциплинска постапка за адвокатите.

Како образложение за ова, судијата истакнал дека со барањето за превод на случајот, адвокатот само сака да ја одолговлечи постапката.

– Ова е злоупотреба на правото од страна на адвокатите, за одоговлекување на постапката, бидејќи се изведени голем број на докази и таа е во фаза на окончување – рече судијата Ставрев.

Тој посочи дека судењето ќе продолжи во фазата каде што е стигната, а отсега адвокатот ќе добие симултантен превод на рочиштата, но нема да бидат преведени материјалите кои досега биле изведени на околу 40 судски рочишта.

Судијата Ставрев ја известил Адвокатската комора и за постапката на адвокатот Димитар Дангов, кој претходно и беше адвокат на обвинетат Елисавета Најдовска, бидејќи, како што рече, без оправдана причина го откажал полномошното, а со иста цел, односно одоговлекување на постапката.

Од Адвокатската комора го известиле судијата дека ќе се поведе дисциплинска постапка против адвокатите.