Поранешниот чешки премиер Бабиш обвинет за манипулирање со медиумите
Поранешниот чешки премиер Андреј Бабиш е обвинет за нарушување на слободата на медиумите, откако ги искористи насловните страници на двата национални весници што тој ги поседува за да го нападне интегритетот на независните медиуми и да ги повика читателите да го следат на социјалните мрежи како алтернатива, пренесува „Гардијан“.
Ваквите наслови ги објавија весниците „Млада Фронта Днес“ и „Лидове новини“ една недела пред Бабиш – еден од најбогатите луѓе во Чешка – да му се суди за наводна измама со субвенциите.
Критичарите рекоа дека тој ја понижил и експлицитно ја омаловажувал работата на новинарите што ги вработува користејќи ги весниците – претходно меѓу најпочитуваните во Чешка – за да објави две идентични насловни страници на кои доминира неговата слика и со наслов: „Дали верувате во медиуми?“
České denníky Mladá fronta Dnes a Lidové noviny dnes vyšli s inzerciou Andreja Babiša, ktorá na titulnej strane spochybňuje nestrannosť a objektivitu novinárov.
• @dennikN https://t.co/XLbVEhn1hT pic.twitter.com/mLGsNbzKxJ— Richard Balázs (@balazsrichard) September 5, 2022
„Зарем не чувствувате дека телевизијата, весниците и веб-страниците за вести ви кажуваат само дел од приказната? Дека не зборуваат за ништо? Дека изоставуваат нешто? Или тие намерно испуштаат нешто?“ пишува во објавите на Бабиш.
Поддржувачите на Бабиш ја оправдаа пораката на насловната страница како само реклама за неговото ТВ-шоу на социјалните мрежи, Čau lidi, што другите чешки весници одбија да го прифатат. Во неговата порака се вели: „Чујте го мојот совет. Секој понеделник попладне. Повеќе од пет години. На сите социјални мрежи“.
Но, Вероника Седлачкова, од Меѓународниот институт за медиуми на Чешка, рече дека тоа е „напад врз сериозното новинарство и сериозните медиуми“.
Таа додаде: „Бабиш го правеше ова долго време и тоа не се разликува толку од неговите претходни изјави. Неговата цел е да го ослабне влијанието на сериозните медиуми и да ја ослабне довербата на јавноста во новинарите и демократските институции на Чешка“.
Доколку биде прогласен за виновен, на Бабиш (68) му се заканува максимум 10 години затвор, иако обвинителите предложија три години условна казна и 10 милиони чешки круни (350.000 фунти). Поранешниот премиер беше обвинет во март минатата година, пет месеци по губењето на власта на општите избори, откако пратениците гласаа за одземање на неговиот пратенички имунитет на кривичното гонење.