Половни автомобили никогаш поскапи: побарувачката ја надминува понудата
Побарувачката за половни автомобили се зголемува и ја надминува понудата, па нивната цена во Европа во ноември била 24.772 евра во просек по возило.
Тоа е за речиси 12 отсто повеќе од пред една година и е највисоко од следењето на статистиката, објави РТС. Според податоците на онлајн дилерот Аутоскаут24, ваквата состојба е последица на кризата во автомобилскиот сектор.
Списанието ХАК забележува дека пред две години многу фабрики беа затворени поради корона вирусот, а потоа имаше и светски недостиг на чипови. И на крајот, како што се наведува, ова беше проследено со недостиг на приклучоци за кабли за возила, кои се произведуваат во Украина.
Се додава дека во меѓувреме побарувачката е зголемена бидејќи некои нови автомобили сега имаат рок на испорака од една година, што ги прави користените автомобили попривлечни. Се вели дека состојбата на пазарот полека се подобрува, иако цените се уште растат, па доколку продолжи трендот на пораст, просечната цена на половен автомобил на крајот на годината на европскиот пазар ќе надмине 25.000 евра. Првите информации од Австрија и Германија велат дека оваа граница е веќе пробиена.