Македонскиот слемер Никола Дукоски ја претставуваше Македонија на Европското слем првенство во Брисел, Белгија, што се одржа на 8, 9 и 10 декември. Дукоски се натпреваруваше заедно со 19 други национални претставници од 20 европски земји. Земја-победничка годинава е Белгија, а победата ѝ ја донесе претставничката Мари Дара.

Тридневниот фестивал понуди различни програми кои можеше да се следат со физичко присуство и онлајн, како дебати, форуми, работилници и натпреварувачкото слем-финале. Жирирањето на финалето беше комбинирано – со избор од петчлено жири од публиката, избор од национално жири од секоја земја-учесничка и глобално онлајн-гласање. Македонско национално жири беше Валерија Дамчевска, која го освои третото место на националниот избор во Прилеп оваа година.

„Европското слем првенство сè уште трае во сите изведувач(к)и, кои во ниту еден момент не се почувствуваме како натпреварувач(к)и. Трае затоа што се поврзавме со разговори, уметност, поезија, музика, духовност и, пред сè, човечност. Организацијата беше одлична, а слем-перформансите се случуваа и зад сцената, каде што сите уживавме“, истакна македонскиот претставник Никола Дукоски.

(Текстот е објавен во „Културен печат“ број 110, во печатеното издание на весникот „Слободен печат“ на 18-19 декември 2021)