На обвинителнта клупа во судот во Версај денеска ќе седнат поранешни раководиетли на „Икеа Франс”, но и полицајци и шефот на приватна компанија за надзор, обвинети дека шпионирале вработени во француската подружница на шведскиот гигант за мебел. Компанијата ризикува да добие казна до 3,75 милиони евра, јави дописникот на МИА.

Аферата беше откриена од „Канар еншене” и Медиапарт во 2012 година, а случајот се испитуваше по жалба на синдикатот што ја разниша „Икеа Франс”, принудена да разреши четворица високи раководители. Истрагата на тој начин откри, според зборовите на обвинителството во Версај, „шпионски систем” на вработени, но и на кандидати за вработување.

Според обвинителството, неколку стотици лица, вклучително и синдикалци, биле под лупа, биле испитувани нивните криминални досиеја или нивниот стил на живеење.

Така од денеска ќе им се суди на петнаесет физички лица, вклучувајќи управители на продавници, полицајци, но и поранешниот извршен директор Стефан Вановербеке (на функција од 2010 до 2015 година) и неговиот претходник Жан-Луј Бајло.

Според инструкцискиот налог на предметот, Жан-Франсоа Париз, поранешен директор за управување со ризици во „Икеа Франс”, испратил списоци на луѓе „на тест” до приватни истражни компании на кои подружницата им одвоила буџет од 30.000 до 600.000 евра годишно.

Соочени со 74-те граѓански тужби, обвинетите ќе треба да одговорат за точките за недозволено собирање и откривање на лични информации, повреда на професионалната тајност или дури и прикривање на овие дела, што излага некои од нив на максимална казна од десет години затвор.