Министерката за одбрана Славјанка Петровска коментирајќи ги бугарските притисоци кон македонското малцинство во Албанија за изјаснувањето на нивната национална припадност на пописот што се спроведува во таа земја порача дека тие имаат апсолутно право да се потпишат онака како што се чувствуваат.

Прашањето на самоопределување на секој еден граѓанин без разлика на која територија се наоѓа е една од темелните европски вредности. Македонците во Албанија имаат апсолутно право да се произнесат онака како што се чувствуваат односно да се произнесат како Македонци. Всушност една од заложбите за кои интензивно разговараме изминатиов период е процесот на Европска интеграција на нашата држава – изјави Петровска во одговор на новинарско прашање на прес-конференција.

Таа посочи дека една од целите на европското интегрирање е со зачленувањето на државава во ЕУ, македонскиот пасош да биде европски што ќе овозможи граѓаните да не чувствуваат, како што рече, притисоци или да бидат залажувани со некои бенефиции за да се попишат различно од она што го чувствуваат.

Така што, интересите за граѓаните на Република Северна Македонија или за нејзините припадници без разлика каде живеат, повторно ќе кажам, се докажуваат со реални постапки а не само со говори – заклучи таа.