Специјалната воена операција во Украина не зависи од временските услови и таа продолжува, изјави за медиумите портпаролот на Кремљ, Дмитри Песков.

„Специјалната воена операција продолжува, таа не зависи од климатските или временските услови. Нејзините цели мора да се постигнат“, рече Песков, според руската прорежимска новинска агенција ТАСС.

Одговарајќи на прашање за милионите украински граѓани кои останаа без струја и топлина на 15 ноември поради борбени операции во време кога временските прогнози предвидуваа пониски температури на воздухот, Песков рече дека тоа е резултат на напад на воена инфраструктура.

„Ова се случи поради одбивањето на Киев да води преговори со Русија“, рече Песков.

Портпаролот на руското Министерство за одбрана Игор Конашенков вчера изјави дека на 15 ноември руските вооружени сили извршиле масовен напад со високопрецизно, воздушно и поморско оружје со долг дострел врз воениот команден и контролен систем на Украина и поврзаните енергетски објекти. Тој рече дека целите на нападот се постигнати.